Dosjet e publikuara së fundmi të Jeffrey Epstein kanë futur në qendër të skandalit Miroslav Lajčákun, ish-emisar i Bashkimit Evropian për dialogun Kosovë-Serbi.

Sipas dokumenteve, Lajčák kishte komunikim të rregullt me Epstein dhe në disa mesazhe përmenden “vajzat.” Në një prej këtyre shkëmbimeve, Lajčák thuhet se i ka thënë Epstein se “vajzat ishin të mira,” një formulim që ka shkaktuar reagime të ashpra për shkak të historisë kriminale të Epstein.

Toni i mesazheve sugjeron një raport të afërt dhe jo thjesht formal. Lajčák dhe Epstein jo vetëm që kanë shkëmbyer mesazhe, por edhe janë takuar disa herë, duke ngritur pikëpyetje serioze mbi etikën dhe përgjegjësinë e një diplomati të rangut të lartë evropian.

Përveç bisedave për vajza, dosjet zbulojnë edhe përmbajtje politike. Në një mesazh tjetër, Lajčák i shkruan Epstein, “E dua Lavrovin,” duke iu referuar ministrit të jashtëm rus Sergey Lavrov. Ky koment ka nxitur kritika të forta, veçanërisht në Kosovë, duke pasur parasysh rolin e Rusisë kundër shtetësisë së Kosovës.

Në kohën e këtyre komunikimeve, Lajčák ishte një nga figurat kyçe të BE-së, i ngarkuar me ndërmjetësimin e dialogut mes Kosovës dhe Serbisë.

Pas publikimit të këtyre mesazheve, presioni politik në Sllovaki u rrit ndjeshëm. Lajčák ka dhënë dorëheqje nga posti i këshilltarit të kryeministrit sllovak Robert Fico, menjëherë pas daljes së dosjeve Epstein.