Pesëdhjetë vjet pasi një flamur gjigand amerikan valëvitej krenarisht mbi Urën Verrazzano-Narrows për festimet e 200-vjetorit të Pavarësisë së SHBA-së, një student i ri shqiptaro-amerikan po përpiqet ta sjellë përsëri këtë simbol të fuqishëm për 250-vjetorin që do të shënohet në vitin 2026.

Alesio Bejleri, 21-vjeçar dhe student në College of Staten Island, ka nisur një nismë për të vendosur përsëri një flamur të madh amerikan mbi urën që lidh Staten Island me Brooklynin. I frymëzuar nga ngjarja historike e vitit 1976, kur një flamur prej 70,000 metra katror u vendos për pak kohë përpara se era e fortë ta shqyente, Bejleri synon të nderojë këtë përvjetor të veçantë duke mësuar nga gabimet e së kaluarës.

“Desha ta rikrijoja të njëjtën gjë, por ta bëjmë në mënyrë të zgjuar që të mos përsërisim gabimet e kaluara,” tha Bejleri.

Duke qenë se ura është në juridiksionin e MTA-së, Bejleri iu drejtua për ndihmë zyrtarëve lokalë. Përpjekjet e tij morën shpejt mbështetje. Këtë muaj, anëtari i Këshillit të Qytetit David Carr, bashkë me Senatoren Shtetërore Jessica Scarcella-Spanton dhe Asamblistin Michael Tannousis, dërguan një letër zyrtare në MTA, duke kërkuar miratimin për vendosjen e flamurit në urë për festimet e 250-vjetorit.

Zyrtarët theksuan se një gjest i tillë do të ishte një mënyrë e fuqishme për të nderuar historinë amerikane dhe për të mirëpritur anijet që hyjnë në portin e Nju Jorkut gjatë festimeve të 4 Korrikut.

Në përgjigje, zëdhënësi i MTA-së, Aaron Donovan, tha se agjencia është “duke hetuar mënyra të sigurta për të vendosur flamurin në mënyrë që të mos dëmtohet nga era ose të pengojë trafikun,” dhe se do të informojë zyrtarët për rezultatet dhe planet e tyre.

Me më shumë se një vit kohë deri në festimet e 250-vjetorit, Bejleri dhe mbështetësit e tij mbeten optimistë se Ura Verrazzano-Narrows do të zbukurohet sërish me një flamur madhështor amerikan — falë vizionit dhe përkushtimit të një të riu shqiptaro-amerikan.