Shqiptaro-amerikanët u mblodhën të martën mbrëma, më 22 shtator, para selisë së Kombeve të Bashkuara në New York, në protestë kundër vendimit të Gjykatës Speciale ndaj katër ish-krerëve të Ushtrisë Çlirimtare të Kosovës (UÇK).

Tubimi u mbajt në Dag Hammarskjöld Plaza në Manhattan, vetëm pak metra nga OKB-ja, në kohën kur liderët botërorë mbërrijnë në qytet për Asamblenë e Përgjithshme. Protesta u thirr nga platforma “Liria ka Emër”, e cila u bëri thirrje shqiptarëve në mbarë SHBA-në t’i bashkohen.

Protestuesit kërkuan rishikimin e vendimit dhe lirimin e Hashim Thaçit, Kadri Veselit, Jakup Krasniqit dhe Rexhep Selimit. Në pankarta shkruhej “Drejtësi, jo politikë”, “Lironi heronjtë tanë” dhe “Heronj të luftës e të paqes”.

Të tjerë ngritën çështjen e viktimave civile të forcave serbe gjatë luftës, me një pankartë që pyeste: “Ku janë kriminelët që masakruan 147 civilë në Izbicë?”

Organizatorët e cilësuan protestën si zërin e mërgatës dhe kujtesë për sakrificën e atyre që luftuan për lirinë e Kosovës.

Më 16 shtator, gjykata me seli në Hagë i shpalli të katërt fajtorë për krime lufte, përfshirë ndalimin arbitrar, trajtimin mizor, torturën dhe vrasjen, të kryera nga prilli i vitit 1998 deri në qershor 1999 në Kosovë dhe në dy lokacione në Shqipëri. Të katërt u shpallën të pafajshëm për krime kundër njerëzimit.

Thaçi dhe Krasniqi u dënuan me nga 25 vjet burgim, Veseli me 18 dhe Selimi me 13, gjithsej 81 vjet. Vendimi i shkallës së parë pritet të apelohet.

New York-u është ndalesa më e re në një valë protestash që ka përfshirë Kosovën dhe diasporën. Tubime janë mbajtur në Kanada, Zvicër, Gjermani dhe Austri, ndërsa disa ditë më parë shqiptarët u mblodhën edhe në Times Square. Në Prishtinë, protestat hynë të mërkurën në ditën e tetë.

Dhomat e Specializuara u krijuan me një ligj të miratuar nga Kuvendi i Kosovës në vitin 2015, nën presionin e aleatëve perëndimorë. Gjykata është pjesë e sistemit të drejtësisë së Kosovës, por ka selinë në Hagë dhe gjyqtarë ndërkombëtarë.