Eduard Dervishaj, shqiptari që ka dhënë një kontribut të rëndësishëm në sukseset e futbollit spanjoll, festoi triumfin historik të Spanjës në Kupën e Botës 2026 si pjesë e delegacionit zyrtar të kombëtares.

I lindur dhe rritur në Tiranë, Dervishaj jeton në Spanjë që nga viti 1997, ku ka ndërtuar një karrierë të jashtëzakonshme në Federatën Mbretërore Spanjolle të Futbollit. Aktualisht ai drejton Departamentin e Marrëdhënieve Ndërkombëtare dhe Operacioneve, ndërsa më herët ka mbajtur edhe postin e zëvendëssekretarit të përgjithshëm.

65-vjeçari ishte pjesë e rrugëtimit të Spanjës drejt titullit të Botërorit 2026, duke qenë pranë ekipit gjatë turneut në Amerikën e Veriut, ku “La Roja” ngriti trofeun për herë të dytë në histori. Pas suksesit, Dervishaj publikoi fotografi me Kupën e Botës dhe trajnerin Luis de la Fuente, duke falënderuar të gjithë ata që kontribuan në këtë arritje.

Gjatë karrierës së tij, Dervishaj ka qenë pjesë e organizimit të katër finaleve të UEFA Champions League, ndërsa së fundmi iu besua drejtimi i projektit organizativ të Kupës së Botës 2030, që do të zhvillohet në Spanjë, Portugali dhe Marok.

Përpara suksesit në Spanjë, ai dha një kontribut të rëndësishëm edhe në futbollin shqiptar. Dervishaj shërbeu si sekretar i përgjithshëm i Federatës Shqiptare të Futbollit nga viti 1992 deri në 1996, ndërsa më herët ishte edhe trajner i Dinamos së Tiranës.