Një shkencëtare e re shqiptare në Shtetet e Bashkuara të Amerikës po tërheq vëmendje me një zbulim premtues në fushën e kërkimeve kundër kancerit, pas katër vitesh punë intensive shkencore.

Eranda Berisha po përgatitet të prezantojë doktoraturën e saj në Inxhinieri Gjenetike dhe Shkencë të Teknologjive Celulare në University of Texas at Dallas, ku hulumtimi i saj është fokusuar në mënyrën se si zhvillohen dhe përhapen viruset që lidhen me kancerin.

Studimi i saj analizon virusin KSHV, i njohur si shkaktar i Sarkomës së Kaposit, një formë e rrallë e kancerit. Gjatë kërkimeve, Berisha identifikoi proteinën FABP4 si faktor kyç që ndihmon virusin të shumohet dhe të nxisë zhvillimin e qelizave kancerogjene.

Zbulimi shpjegon se si virusi manipulon yndyrnat brenda qelizave njerëzore për të mbijetuar dhe për t’u përhapur — një gjetje që studiuesit besojnë se mund të hapë rrugë të reja për trajtime më të avancuara kundër kancerit në të ardhmen.

Projekti është mbështetur nga disa prej institucioneve më prestigjioze ndërkombëtare, përfshirë Chan Zuckerberg Initiative, Cold Spring Harbor Laboratory, Massachusetts Institute of Technology, Stanford University dhe Imperial College London.

Punimi shkencor është publikuar gjithashtu në BioRxiv, një nga platformat më të njohura ndërkombëtare ku studiuesit publikojnë zbulimet e tyre shkencore para procesit zyrtar të vlerësimit akademik.