Një moment historik dhe krenarie për gjithë komunitetin shqiptar: Nebi Qena, një gazetar i njohur nga Kosova, është emëruar Zëvendësdrejtor për Video në Shtetet e Bashkuara në agjencinë prestigjioze ndërkombëtare të lajmeve, Associated Press (AP) — duke u bërë shqiptari i parë ndonjëherë që mban këtë pozitë të lartë.

Lajmi u bë i ditur përmes një letre drejtuar stafit nga Drejtori i Lajmeve për SHBA-në në AP, Josh Hoffner, i cili lavdëroi punën dhe përkushtimin e Qenës në disa nga zonat më të ndërlikuara të raportimit global. “Ai ka shkëlqyer në çdo rol që ka mbajtur — shumë prej tyre në kushte jashtëzakonisht sfiduese,” shkroi Hoffner, duke përmendur angazhimin e Qenës në mbulimin e konflikteve në Izrael, Gaza dhe Bregun Perëndimor, misionet në Ukrainë, si dhe ngjarje madhore në ShBA, përfshirë zjarret në Los Angeles dhe sulmet terroriste në Nju Orleans.

Qena e nisi karrierën si gazetar i ri gjatë luftës në Kosovë, duke raportuar për gazetën prestigjioze Koha Ditore. Pas luftës, ai punoi për vite në Radio Televizionin e Kosovës, përpara se t’i bashkohej Associated Press, ku u ngjit shpejt në pozita udhëheqëse falë profesionalizmit dhe angazhimit të tij. Gjatë këtyre viteve, ai ka shërbyer në role kyçe në Evropë, Jeruzalem, dhe së fundmi në Uashington D.C.