Presidentja e Republikës së Kosovës, Vjosa Osmani, ka deklaruar se Presidenti i Shteteve të Bashkuara të Amerikës, Donald Trump, e meriton Çmimin Nobel për Paqe, një deklaratë që ka nxitur reagime dhe debat të gjerë ndërkombëtar.

Duke folur për revistën amerikane Newsweek, Osmani u pyet nëse do ta nominonte Trumpin për këtë çmim prestigjioz. Përgjigjja e saj ishte e prerë:

“Sigurisht. Nëse unë jam presidente kurdo që këto gjëra të ndodhin. Nuk ka dyshim se ai e meriton.”

Presidentja theksoi se Kosova e vlerëson kontributin e Trumpit për paqen nga afër, veçanërisht në Ballkanin Perëndimor.

“E di që ka të tjerë që mund të kenë mendime të ndryshme, por ne e shohim kontributin e tij nga afër,” tha Osmani.

Duke folur nga Samiti i Qeverive Botërore në Dubai, ajo e përshkroi Kosovën si “popullin më pro-amerikan në Tokë”, duke nënvizuar mirënjohjen e thellë për rolin e SHBA-së në historinë e vendit.

Osmani bëri të ditur se ka zhvilluar katër biseda me Presidentin Trump, të cilat i përshkroi si të shkurtra, por “shumë kuptimplota”, duke shtuar se ai ka dhënë një “kontribut të jashtëzakonshëm” për paqen.

Çmimi Nobel për Paqe jepet çdo vit nga Komiteti Norvegjez i Nobelit. Vetëm një numër i kufizuar personash, përfshirë krerë shtetesh, kanë të drejtë të paraqesin nominime, ndërsa fituesi shpallet në muajin tetor.

Trump ka shprehur vazhdimisht publikisht bindjen se e meriton këtë çmim, duke e cilësuar veten si një lider që ka ndihmuar në ndalimin dhe parandalimin e konflikteve në zona të ndryshme të botës.