Departamenti Amerikan i Shtetit ka vendosur të pezullojë përpunimin e vizave imigruese për 75 shtete, përfshirë Shqipërinë dhe Kosovën, në kuadër të një mase të re shtrënguese ndaj emigracionit.

Sipas një memorandumi të Departamentit të Shtetit, të siguruar nga Fox News Digital, zyrtarët konsullorë janë udhëzuar që të refuzojnë vizat imigruese gjatë një rishikimi të plotë të procedurave të verifikimit dhe kontrollit. Pezullimi hyn në fuqi më 21 janar dhe do të zgjasë pa afat të caktuar.

Shqipëria dhe Kosova janë përfshirë në listën e shteteve të prekura, çka nënkupton se aplikimet për viza imigruese nga qytetarët e tyre do të ngrihen, përfshirë edhe ato që janë në pritje prej muajsh apo vitesh.

Masa pason një udhëzim të dërguar në nëntor 2025 në ambasadat dhe konsullatat amerikane në mbarë botën, i cili kërkon zbatim më të rreptë të dispozitës ligjore të njohur si “public charge”. Sipas këtij udhëzimi, vizat duhet të refuzohen për aplikantët që konsiderohen se mund të varen nga ndihmat sociale në SHBA.

Në vlerësim përfshihen faktorë të shumtë, si shëndeti, mosha, njohja e gjuhës angleze, gjendja financiare, përdorimi i mëparshëm i ndihmave shtetërore, si dhe nevoja e mundshme për kujdes mjekësor afatgjatë. Aplikantët më të moshuar, mbipeshë apo me histori përfitimi nga ndihmat publike mund të refuzohen.

Vendimi vjen në një klimë kontrolli të shtuar pas zbulimit të skandaleve të mëdha të mashtrimit me fondet publike në SHBA, të cilat zyrtarët federalë i kanë përdorur si argument për politika më të ashpra imigruese.

Një zëdhënës i Departamentit të Shtetit deklaroi se SHBA do të përdorë autoritetin e saj ligjor për të ndaluar hyrjen e emigrantëve që mund të bëhen barrë për sistemin e ndihmave sociale. Përjashtimet nga ky pezullim do të jenë shumë të kufizuara.

Edhe pse rregulli “public charge” ka ekzistuar prej dekadash, zbatimi i tij ka ndryshuar nga një administratë në tjetrën. Masa e re sinjalizon një rikthim të politikave më të ashpra të periudhës së Presidentit Donald Trump.

Për shumë familje nga Shqipëria dhe Kosova që synojnë të emigrojnë apo të ribashkohen me të afërmit në SHBA, ky vendim sjell pasiguri, vonesa dhe rrezik real për refuzim të vizave, pa një afat të qartë se kur do të rifillojë përpunimi.