Për të tretën ditë radhazi, qytetarë nga zona të ndryshme të Shqipërisë u mblodhën në Tiranë për të protestuar kundër projektit të planifikuar në zonën e mbrojtur të Zvërnecit. Tubimi u zhvillua para Kryeministrisë, ndërsa protestuesit kërkuan anulimin e projektit dhe reaguan ndaj thirrjes së kryeministrit Edi Rama për dialog.

Me pankarta në duar dhe thirrje kundër klasës politike, pjesëmarrësit theksuan se nuk kërkojnë negociata me qeverinë, por dorëheqje. Një nga sloganet më të dëgjuara gjatë protestës ishte: “Rama n’burg, Berisha n’burg.”

Në protestë u shfaqën edhe pankarta me mesazhe të forta drejtuar qeverisë. Një prej tyre mbante mbishkrimin: “Dorëheqje, jo dialog!”, duke reflektuar qëndrimin e protestuesve ndaj ftesës së Ramës për bisedime.

Qytetarët shprehën shqetësimet e tyre për ndikimin që projekti mund të ketë në mjedis, biodiversitet dhe pasuritë natyrore të zonës së Zvërnecit. Ata kërkuan që institucionet shtetërore të dëgjojnë zërin e komunitetit dhe të rishikojnë planet për zhvillimin e projektit.

Protesta u zhvillua pa incidente, ndërsa organizatorët paralajmëruan se mobilizimi do të vazhdojë edhe në ditët në vijim nëse kërkesat e tyre nuk merren parasysh.