Në përmbyllje të mandatit të tij, Kryetari i Bashkisë së Nju Jorkut, Eric Adams, organizoi një event të veçantë në nder të Organizatës Albanian Roots dhe të komunitetit shqiptaro-amerikan, duke vlerësuar kontributin e tyre të jashtëzakonshëm në jetën e qytetit.

Në ngjarje morën pjesë përfaqësues të njohur të komunitetit, përfshirë familjen Rusi, Marko Kepin dhe Bedrana Dukën, të cilët bashkë mundësuan Paradën e Parë të Albanian Roots në Nju Jork — një moment historik për shqiptarët në SHBA.

Eventi u hap nga z. Eli Rusi, i cili përshëndeti të pranishmit dhe prezantoi valltarët me “Valljen e Dibrës.” Në fjalën e tij, Kryetari Adams falënderoi komunitetin shqiptar për energjinë dhe kontributin e vazhdueshëm, duke theksuar se “shqiptarët janë forcë pozitive dhe shtyllë e zhvillimit të Nju Jorkut.”

Të pranishëm ishin edhe Ambasadori i Shqipërisë në SHBA, Ervin Bushati, Ministrja për Punët e Jashtme, Miriam Shyti, si dhe këngëtari i dashur Gëzim Nika, që solli emocion dhe krenari kombëtare me performancën e tij.