Anëtari i këshillit të qytetit të Wylie, Texas, Gino Mulliqi, është betuar për një mandat tjetër 3-vjeçar dhe është rizgjedhur sërish si “Mayor Pro Tem” nga kolegët e tij në këshillin komunal.

Në një postim emocional në rrjetet sociale, Mulliqi ka reflektuar mbi rrugëtimin e tij – nga një djalë 13-vjeçar gjatë luftës në Kosovë, deri te mbajtja e një pozite publike në Shtetet e Bashkuara.

Ai kujtoi frikën dhe pasigurinë e kohës së luftës në Kosovë, e më pas rrugën që i ndryshoi jetën: ardhjen në SHBA si student shkëmbimi në Oregon, zhvendosjen në New York, ndërtimin e karrierës në Verizon, hapjen e një biznesi dhe më në fund hyrjen në politikën lokale në Teksas.

“Amerika më dha një mundësi. Wylie më dha një shtëpi” ka shkruar ai, duke theksuar mirënjohjen e tij ndaj komunitetit që sot i shërben.

Mulliqi ka falënderuar qytetarët e Wylie, Texas për besimin, kolegët e tij për mbështetjen dhe familjen për përkrahjen e vazhdueshme gjatë gjithë rrugëtimit të tij.

Ai e ka përshkruar këtë moment si të mbushur me mirënjohje, përulësi dhe përgjegjësi, duke riafirmuar përkushtimin e tij për t’i shërbyer komunitetit.