Shkrimtarja shqiptaro-amerikane Ledia Xhoga është përfshirë në listën e gjatë të pretendentëve për çmimin prestigjioz “Booker Prize 2025”, me romanin e saj të parë “Keqinterpretimi” (Misinterpretation).

Romani, i vendosur në Nju Jork, ndjek historinë e një përkthyeseje shqiptare që përfshihet emocionalisht me një klient nga Kosova — një i mbijetuar torture. Gjatë rrugëtimit të saj të brendshëm, ajo përballet me kujtime të dhimbshme, kriza identiteti dhe një përballje të fortë me realitetin në Shqipëri.

“Keqinterpretimi”, botuar nga Daunt Books Originals, është vlerësuar për ndjeshmëri dhe thellësi emocionale, duke trajtuar tema si trauma, kujtesa dhe identiteti.

Librat finalistë për çmimin do të shpallen më 23 shtator, ndërsa fituesi më 10 nëntor në Londër.