Drake e ka sjellë edhe një herë Shqiponjën shqiptare në ekran.
Në videoklipin e ri të këngës “Ya Hit” të Future, reperi kanadez mban në zinxhir një varëse të madhe me diamante në formën e Shqiponjës dykrenare. Në një skenë ai e ngre atë para fytyrës, duke mbushur të gjithë kuadrin.
“Ya Hit”, që bashkon Future, Drake, Travis Scott dhe Loe Shimmy, doli të premten, më 6 nëntor, si këngë e parë nga albumi i ardhshëm i Future. Videoklipi, me regji të COTTO dhe IWANTJUAN, u publikua këtë javë.
Nuk është hera e parë që Drake e mban këtë simbol. Në nëntor të vitit 2023 ai u shfaq me një xhaketë me Shqiponjën në videoklipin e këngës “Polar Opposites”, të publikuar një ditë pas Ditës së Pavarësisë së Shqipërisë. Rolling Stone e përshkroi atëherë videon si një festim të Ditës së Pavarësisë nga Drake.
Ai ka ndarë gjithashtu në Instagram Story një selfie me një kapelë të kuqe me Shqiponjën e zezë.
As Drake e as shtëpia diskografike e Future nuk e kanë komentuar varësen, dhe nuk dihet se kush e ka punuar.
Shqiponja e zezë dykrenare në fushë të kuqe është emblema e flamurit të Shqipërisë dhe një nga simbolet më të njohura të identitetit shqiptar, në Shqipëri, në Kosovë dhe në diasporë.
