Komuniteti shqiptar shënoi një moment historik të dielën, më 27 prill, me hapjen madhështore të qendrës së parë kulturore shqiptare në New York, themeluar nga Shoqata “Ana e Malit” në Staten Island.

Prej vitesh, bijtë dhe bijat e Anës së Malit ëndërronin një vend të tyrin — një qendër për të ruajtur kulturën, për të forcuar lidhjet komunitare dhe për të festuar trashëgiminë shqiptare. Kjo ëndërr u bë realitet me hapjen e një godine të re, që mban me krenari logon “Ana e Malit” në hyrje.

Qindra shqiptarë morën pjesë në ceremoninë emocionuese të inaugurimit. Mikpritësit e këtij eventi ishin drejtuesit e shoqatës Albert Salaj, Safet Llolla, Melinda Gjeloshi dhe Ajete Cuca. Të pranishëm ishin edhe anëtarë të Shoqatës së Policëve Ilirë në NYPD, krenaria e shqiptarëve në shërbim të komunitetit.

Festa u shoqërua me këndimin e himnit amerikan dhe atij shqiptar nga sopranoja Dëshira Ahmeti Kërliu, valle tradicionale shqiptare dhe fjalime emocionuese nga autoritete vendore si Presidenti i Borough-it të Staten Island, Vito Fossella, përfaqësues të Kongresistes Nicole Malliotakis, këshilltarë bashkiakë, senatorë të shtetit dhe figura të tjera të njohura.