Parada tradicionale shqiptare “Rrënjët Shqiptare” u zhvillua sot, më 21 qershor 2025, në Manhattan të New York-ut, duke mbledhur mijëra shqiptarë nga e gjithë Amerika dhe më gjerë. Ngjarja, e organizuar nga organizata jofitimprurëse “Rrënjët Shqiptare”, festoi trashëgiminë, kulturën dhe identitetin shqiptar në një nga qytetet më të mëdha të botës.

Parada nisi në orën 10:00 të mëngjesit me orën lokale, nga Central Park West & 81st Street dhe vijoi me një festival kulturor në rrugën W 72nd Street. Pjesëmarrësit shijuan muzikë tradicionale, valle shqiptare, ushqime të vendit dhe atmosferë festive me flamuj kuq e zi në çdo cep të rrugëve të Manhattanit.

Para paradës, Kryetari i Bashkisë së New York-ut, Eric Adams, organizoi një pritje për komunitetin shqiptar, duke vlerësuar kontributin dhe traditat e shqiptarëve në këtë qytet.

Gjatë aktivitetit, organizata “Rrënjët Shqiptare” nderoi personalitete dhe organizata të dalluara për kontributin e tyre në komunitetin shqiptaro-amerikan, përfshirë:

Hasan Metuku, Jasmin Novaj, Arvid Hoxha, Age Gjokaj Ivezaj, Blerim Koçani, Dilaver Duka, Joseph Saljani (pas vdekjes), Ahmet Hoti, Fadil Berisha, Dibra Community Center dhe Our Lady of Shkodra Church.

Ngjarja u mbështet gjithashtu nga ish-këshilltari i qytetit të New York-ut, Mark Gjonaj, dhe figura të tjera të njohura të komunitetit. Me moton “Rrënjët na mbajnë tokës, por bashkimi na çon larg,” Parada Shqiptare 2025 ishte edhe këtë vit një moment i rëndësishëm për bashkimin e shqiptarëve në diasporë.