Mijëra shqiptaro-amerikanë u mblodhën të shtunën në Manhattan për Paradën Shqiptare, e organizuar nga Albanian Roots.

Pjesëmarrës nga shtete të ndryshme të SHBA-së marshuan me flamujt e Shqipërisë, Kosovës dhe Shteteve të Bashkuara, të veshur me kostume tradicionale nga trevat shqiptare.

Parada përfshiu valle popullore, muzikë tradicionale dhe aktivitete kulturore, duke bashkuar shqiptarë nga Shqipëria, Kosova, Maqedonia e Veriut, Mali i Zi, Lugina e Preshevës dhe diaspora.

Ngjarja konsiderohet si një nga festimet më të mëdha të kulturës shqiptare në Shtetet e Bashkuara dhe synon promovimin e trashëgimisë, identitetit dhe kontributit të komunitetit shqiptaro-amerikan.

Edhe këtë vit, rrugët e Manhattanit u mbushën me ngjyrat kuqezi, ndërsa familje, organizata dhe biznese shqiptare iu bashkuan festimeve.