Aktorja me prejardhje nga Kosova, Luana Bajrami, ka arritur një tjetër moment historik në karrierën e saj ndërkombëtare, duke u bërë pjesë e garës për çmimin më prestigjioz në botën e filmit – “Oscar”. Filmi i shkurtër ku ajo mban rolin kryesor, “Deux personnes échangeant de la salive” (“Two People Exchanging Saliva”), është nominuar zyrtarisht në kategorinë Best Live Action Short Film në edicionin e 98-të të Academy Awards.
Projekti është një bashkëprodhim mes Francës dhe Shteteve të Bashkuara të Amerikës dhe ka tërhequr vëmendje të madhe të kritikës ndërkombëtare që nga shfaqja e tij e parë. Bajrami interpreton personazhin kryesor, Malaise, në një film bardhezi me regji dhe skenar të Alexandre Singh dhe Natalie Musteata, i cili spikat për stilin unik vizual dhe qasjen e guximshme tematike.
Ngjarja zhvillohet në një Paris distopik, ku puthjet janë të ndaluara me ligj dhe ndëshkohen ashpër. Përmes një komedie të errët dhe simbolike, filmi trajton temat e dëshirës, tërheqjes, rivalitetit dhe dhunës së stilizuar, duke reflektuar mbi kontrollin shoqëror dhe kufizimin e intimitetit njerëzor. Filmi është shfaqur premierë në Festivalin prestigjioz të Filmit në Telluride dhe më pas ka fituar Çmimin e Madh të Jurisë në AFI Fest, duke u konsideruar si një nga filmat e shkurtër më të komentuar të vitit.
Një tjetër element që e bën këtë projekt edhe më të veçantë është përfshirja e emrave të mëdhenj të kinemasë botërore si producente ekzekutive: Julianne Moore dhe Isabelle Huppert. Mbështetja e tyre ka kontribuar në rritjen e profilit ndërkombëtar të filmit dhe në rrugëtimin e tij drejt Oscar-it.
Ndërkohë, ky edicion i Academy Awards pritet të jetë historik edhe për shkak të filmit “Sinners” të regjisorit Ryan Coogler, i cili ka thyer rekorde duke siguruar plot 16 nominime, më shumë se çdo film tjetër në historinë e Oscar-ëve. Përveç nominimit për Filmin më të Mirë, Coogler garon edhe për Regjinë dhe Skenarin më të Mirë, ndërsa Michael B. Jordan ka marrë nominimin e tij të parë për Aktorin më të Mirë.
Ceremonia e 98-të e ndarjes së çmimeve “Oscar” do të mbahet në muajin mars dhe pritet të shënojë një nga edicionet më të rëndësishme dhe më të larmishme në historinë e këtyre çmimeve.
