Kosova do të shkruajë histori në edicionin e 99-të të çmimeve Oscar, pasi për herë të parë do të përfaqësohet me dy filma në garën prestigjioze të Akademisë Amerikane të Filmit.

Komiteti Përzgjedhës i Qendrës Kinematografike të Kosovës ka zgjedhur filmin “Dua”, me regji të Blerta Basholli, si propozimin zyrtar të Kosovës në kategorinë “International Feature Film”.

Vendimi u mor nga komiteti i përbërë nga Kaltrina Krasniqi, Antoneta Kastrati, Ilir Hasanaj, Tristan Halilaj dhe Vullnet Sanaja.

Në vlerësimin e tij, komiteti veçoi interpretimin e aktores Pinea Matoshi, duke e cilësuar performancën e saj si autentike, bindëse dhe emocionalisht të fuqishme. Po ashtu, u vlerësua edhe qasja regjisoriale e Bashollit për mënyrën se si trajton një periudhë të rëndësishme të historisë së Kosovës përmes një rrëfimi njerëzor dhe të ndjerë.

Por suksesi i këtij viti është edhe më i madh për kinematografinë kosovare. Krahas “Dua”, në garën për Oscar do të jetë edhe filmi “Shame and Money”, me regji të Visar Morina, i cili siguroi kualifikimin falë fitimit të çmimit “Grand Jury Prize” në Sundance Film Festival.

Ky është një moment historik për Kosovën, e cila për herë të parë do të ketë dy përfaqësime në garën për çmimet më të rëndësishme të industrisë botërore të filmit.