Luftëtari shqiptar i UFC-së Bernardo Sopaj është rikthyer fuqishëm në skenë të shtunën mbrëma pasi mposhti Timothy Cuamba në UFC Fight Night në Las Vegas.
Sopaj fitoi me submission në rundin e dytë, pas një dueli intensiv që tërhoqi vëmendjen e fansave të MMA-së në rrjetet sociale. Lufta ishte pjesë e main card në UFC Fight Night: Allen vs. Costa — një nga paraqitjet më të mëdha të karrierës së tij deri tani.
Për Sopajn, kjo ishte një përballje shumë e rëndësishme për të ardhmen e tij në UFC, pasi 24-vjeçari synonte të dëshmonte veten në njërën prej kategorive më të forta të organizatës.
Pas humbjes dramatike ndaj Vinicius Oliveira në vitin 2024 — një luftë që u bë virale në botën e MMA-së — Sopaj hyri në këtë duel me presion për t’u rikthyer. Dhe ai e bëri këtë në mënyrë spektakolare.
Pas një rundi të parë të barabartë, Sopaj e rrëzoi Cuamban me një goditje të fortë me të majtën, para se ta përfundonte luftën me submission në tokë në rundin e dytë.
I lindur në Shqipëri dhe duke përfaqësuar krenarisht rrënjët shqiptare në arenën ndërkombëtare, Sopaj është një prej pak shqiptarëve që garojnë aktualisht në UFC. Ai stërvitet dhe lufton nga Suedia dhe tashmë ka rekord profesional 13 fitore dhe 3 humbje në MMA.
