Boksieri shqiptar Kristian Prenga ka shënuar një tjetër fitore spektakolare në karrierën e tij profesionale, duke triumfuar në mbrëmjen e së shtunës në Atlantic City, SHBA.

Prenga dominoi që nga sekondat e para përballjen ndaj amerikanit Joe Jones, duke e vënë nën presion me kombinime të fuqishme dhe goditje precize. Ritmi i lartë dhe agresiviteti i tij bënë që ndeshja të përfundonte brenda vetëm dy minutash, duke i dhënë shqiptarit një tjetër fitore me “knockout”.

Me këtë sukses, Prenga arrin në 20 fitore me nokaut në karrierën e tij, një statistikë që konfirmon fuqinë dhe dominimin e tij në kategorinë përkatëse të peshës. Performanca e tij u prit me entuziazëm nga tifozët shqiptarë të pranishëm në sallë, si dhe nga ata që e ndoqën ndeshjen nga afër.

Pas përballjes, ai falënderoi mbështetësit për përkrahjen e jashtëzakonshme dhe ia dedikoi fitoren të gjithë shqiptarëve. Kampioni premtoi se do të rikthehet edhe më i fortë në ndeshjet e ardhshme, duke vazhduar ta përfaqësojë Shqipërinë në skenën ndërkombëtare të boksit.