Suzana Shkreli, juriste dhe ish-kandidate për Kongres, ka shpallur zyrtarisht kandidaturën për postin e Sekretares së Shtetit në Michigan, si përfaqësuese e Partisë Demokratike. Me këtë hap, ajo bëhet shqiptaro-amerikania e radhës që synon një nga pozitat kyçe të administratës shtetërore në SHBA.

Gjatë njoftimit, Shkreli theksoi se drejtësia zgjedhore dhe mbrojtja e institucioneve demokratike do të jenë shtylla kryesore të fushatës së saj.

“Prindërit e mi erdhën në këtë vend për të shpëtuar nga autoritarizmi. Tani, ndërsa këto kërcënime po shfaqen edhe këtu, jam e gatshme të mbroj demokracinë tonë, të mbroj Kushtetutën dhe të siguroj të drejtën e votës për çdo banor të Michiganit,” deklaroi ajo.

Kandidatura e Shkrelit vjen në një moment kur çështjet zgjedhore janë në qendër të debatit politik kombëtar, ndërsa shtetet po përballen me sfida të reja në administrimin e zgjedhjeve dhe aksesin e votuesve.

Në 24 orët e para pas shpalljes së kandidaturës, fushata e saj ka regjistruar një mbështetje të konsiderueshme. Shkreli njoftoi se ka mbledhur mbi 200,000 dollarë, një shifër që tregon vrullin e fortë me të cilin ka nisur gara.

“Jam shumë e entuziazmuar të njoftoj se fushata jonë po rritet me shpejtësi dhe kemi mbledhur më shumë se 200,000 dollarë brenda 24 orëve nga lansimi! Ky moment është falë jush, ndaj ju falënderoj. Ne do t’i mbrojmë zgjedhjet në Michigan, së bashku!”, shkroi ajo.

Suzana Shkreli ka një karrierë të gjatë në shërbim publik dhe mbetet një emër i njohur në komunitetin shqiptaro-amerikan. Në vitin 2016 ajo ishte shqiptarja e vetme që kandidoi për Kongresin Amerikan, ku mori edhe mbështetjen e familjes Clinton.