Thellenza Arifi Krasniqi është emëruar Sekretare e degës së Westchesterit të Shoqatës së Kombeve të Bashkuara të SHBA-së. Kjo është një nga degët më të vjetra të rrjetit më të madh qytetar në Amerikë që mbështet OKB-në.
Lajmin e bëri të ditur motra e saj në rrjetet sociale. Ajo tha se është “jashtëzakonisht krenare” për Thellenzën dhe vlerësoi përkushtimin e saj të vazhdueshëm ndaj të drejtave të njeriut, drejtësisë dhe barazisë.
Krasniqi ka mbi 24 vjet përvojë në fushën e të drejtave të njeriut, qasjes në drejtësi, barazisë gjinore dhe sundimit të ligjit, si në nivel ndërkombëtar ashtu edhe në Nju Jork.
Ajo është themeluese dhe drejtoreshë ekzekutive e Caring Human Rights Center. Njëkohësisht është redaktore e përgjithshme e Smit & Herzog on the Law of the European Union, një vepër e njohur referuese për të drejtën e BE-së, e botuar nga LexisNexis.
Karriera e saj përfshin edhe punë në reformat ligjore dhe institucionale në Kosovë, ku ka qenë këshilltare e Kuvendit.
Krasniqi ka përfunduar studimet master në drejtësi (LLM) në Universitetin Pace në Nju Jork, si dhe masterin në Universitetet e Bolonjës dhe Sarajevës.
Ajo bën pjesë në bordin ekzekutiv të degës, krahas presidentes Marcia Brewster, ish-zyrtare e lartë e OKB-së.
Krasniqi tashmë është aktive në rolin e ri. Gjatë javës së nivelit të lartë të Asamblesë së Përgjithshme të OKB-së në shtator, ajo mori pjesë në një takim anësor për lidershipin femëror në multilateralizëm, në Japan Society në Manhattan.
Më 8 tetor, ajo iu bashkua drejtuesve të tjerë të degës në Selinë e OKB-së për forumin “The Age of Longevity”. Forumi u mbajt në Sallën e ECOSOC-ut dhe trajtoi se si jetëgjatësia në rritje po ndryshon shëndetësinë, punën dhe politikat publike.
