Ervin Toro ka lindur në Fier të Shqipërisë dhe ka emigruar në Shtetet e Bashkuara në vitin 1997. Ishte ende shumë i vogël kur u transferua në Nju Jork dhe iu desh pak kohë për t’u përshtatur me kulturën e re.

Por pasi jetoi për shumë vite në Nju Jork, i erdhi ideja për të hapur një kompani mode që promovon identitetin shqiptar.

Ai i tregoi Atlantikut se si i erdhi në mendje kjo ide.

“Duke u rritur kam qenë gjithmonë aktiv në komunitetin shqiptar, e kam kaluar gjithë jetën time të rritur duke organizuar parada, festa dhe evente shqiptare. Përkushtimi im vazhdon në promovimin e identitetit dhe kulturës sonë, por këtë herë duke e bërë atë përmes veshjeve dhe modës. Moda përfaqëson jetën, ka të bëjë me tregimin. Na lidh me momentet e ekzistencës sonë, shton elementet e ndjeshmërisë sonë emocionale dhe fizike duke krijuar besim dhe pavarësi në atë se kush jemi dhe si duam të na duken.”

Toro e quajti kompaninë e tij të modës “Shq1pe” dhe zgjodhi një datë shumë specifike për ta hapur.

“Shq1pe është themeluar në vitin 2019, 28 nëntor 2019 është publikuar për herë të parë. E zgjodha atë datë në mënyrë specifike pasi ka një kuptim të rëndësishëm për njerëzit tanë.”

Marka e tij ka koleksion të ndryshëm për meshkuj dhe femra, por tiparet më të mira të “Shq1pe” janë kapuçët, veshjet aktive dhe kapelet.

Ervin Toro ka punuar për çdo koncept dizajni.

“Aktualisht kemi koleksion të ndryshëm për meshkuj dhe femra, tipari ynë më i mirë janë kapuçët, veshjet aktive dhe kapelet. Ideja ishte që të kishim dizajne casual të veshjeve në rrugë që mund të vishen çdo ditë kur jeni duke dalë ose kur jeni aktiv. Unë personalisht kam punuar në çdo koncept të dizajnit, si një i ri në industri doja të sjell në jetë idetë e mia krijuese dhe të influencoj stilet bashkëkohore urbane.”

Gjatë gjithë këtyre viteve, shumë artistë të njohur kanë veshur veshje të kompanisë së tij.

Dhe, jo secili prej tyre është shqiptar.

“Po, jam i lumtur të them se shumë artistë shqiptarë kanë veshur veshjet tona si: Tayna, Capital T, Rina, Alban Skenderaj, Seven, Brandon Rose, Rock dhe Rob Twizz. Jam shumë krenar që këta artistë vlerësojnë dhe mbështesin markën Shq1pe. Shpresojmë të punojmë me shumë artistë të tjerë në të ardhmen pasi duhet të festojmë suksesin e njëri-tjetrit.”

“Shq1pe” deri më tani ka shitur veshje në 9 vende të ndryshme të Evropës.

Kjo e bën Toron shumë krenar pasi ai i tha Atlantikut se po kalojnë tregun global.

“Shumica e porosive tona bëhen online përmes faqes sonë të internetit www.shq1pe.com ose përmes faqeve tona të mediave sociale në Instagram dhe Facebook. Ne dërgojmë në shumicën e vendeve të botës dhe jam i lumtur të them se deri më tani kemi shitur në 9 vende të ndryshme në Evropë. Kjo na bën shumë krenarë që po kalojmë tregun global. Qëllimi i kompanisë është që të vij në Shqipëri dhe të ketë prezencë në rajon, synimi im ka qenë gjithmonë të kontribuoj përsëri në atdheun tim dhe shpresojmë ta bëjmë këtë së shpejti.”

Ai ka një mesazh për çdo shqiptaro-amerikan që dëshiron të krijojë diçka të tyren, ashtu siç bëri Ervin Toro.

“Këshilla ime është nëse jeni vërtet i apasionuar pas diçkaje, atëherë shkoni për të. Fillimi i biznesit tuaj është shumë punë dhe përkushtim, ju duhet të jeni gati për të vënë në punë orë të gjata dhe të përqendroni të gjithë energjinë tuaj në të. Për sa kohë që jeni të pasionuar pas saj, do të gjeni një mënyrë për ta bërë atë të funksionojë. Mos kini frikë të rrezikoni dhe mos dëgjoni askënd që ju thotë të kundërtën, por thjesht shpërndani krijimtarinë tuaj në botë dhe lëreni universin të vendosë. Ky është mentaliteti me të cilin u futa kur vendosa të krijoj këtë markë, u fokusova në vendosjen e qëllimeve dhe punova çdo ditë për t’i përmbushur ato qëllime.”/Atlantiku