Shqiptari Nikollë Ukaj ka marrë disa vlerësime në gala mbrëmjen “Humanitarian Platinum Leadership Awards 2026”, të mbajtur në selinë e Kombeve të Bashkuara në Nju-Jork.

Ukaj u certifikua për përfundimin e masterklasës intensive në Diplomaci Parandaluese dhe Lidership Ekzekutiv, të organizuar nga Instituti i Politikave Publike dhe Kërkimeve Diplomatike (IPPDR).

Në kuadër të programit, instituti i dha atij edhe njohjen “Peace Practitioner” dhe titullin “Ambasador i Paqes”.

Senatori i shtetit të Nju-Jorkut, Kevin S. Parker, i ndau Ukajt një certifikatë mirënjohjeje dhe një proklamatë në nder të tij, për angazhimin në lidershipin rinor, ndërtimin e paqes dhe bashkëpunimin ndërkombëtar.

Në një reagim publik, Ukaj tha se këto vlerësime e motivojnë të vazhdojë shërbimin ndaj komunitetit, me fokus te dialogu, paqja dhe bashkëpunimi mes njerëzve dhe institucioneve.

Ai falënderoi IPPDR-në, Dr. Andrise Bass dhe senatorin Parker për besimin dhe vlerësimin.