Kur stilistja shqiptare Lejda Troci hapi Javën e Modës në Paris me koleksionin e saj A Tangerine Design, publiku në hotelin luksoz Shangri-La pa më shumë se thjesht modë pasi pa një histori guximi, shprese dhe rikthimi.

Në pasarelë dolën 20 modele me krijime elegante që ndërthurën finesën bashkëkohore me elemente të kulturës shqiptare. Një prej modeleve mbante plisin shqiptar, simbol i krenarisë kombëtare që Lejda e përcolli me shumë dashuri në skenën e Parisit. Në fund, kur ajo doli me vajzën e saj të vogël për dorë, publiku shpërtheu në duartrokitje. Ishte një moment që bashkoi artin, nënësinë dhe forcën njerëzore në një skenë të vetme.

“Ishte një ndjenjë e mrekullueshme” tha ajo për Atlantikun. “Ka qenë një vit shumë i vështirë, por ia dola. Jam e lumtur që solla kulturën tonë shqiptare në skenën e Parisit.”

Ajo që Lejda e përshkruan si “vit i vështirë” ishte në fakt një betejë për jetën. Prej më shumë se një viti e gjysmë, ajo është përballur me kancerin, një sëmundje që gati sa nuk i ndaloi ëndrrat.

“U diagnostikova me kancer dhe mendova se nuk do të mund ta bëja këtë” rrëfen ajo. “Por me mbështetjen e familjes, bashkëshortit dhe vajzës sime — edhe pse shumë e vogël — ia dola. Ata ishin forca ime më e madhe.”

Pas suksesit në Paris, Lejda po përgatitet për Floridën, ku në fund të tetorit do të mbajë një fjalim për 20 gra që po kalojnë trajtimin e kancerit, në kuadër të Muajit të Ndërgjegjësimit për Kancerin e Gjirit. “Do të flas për guximin dhe optimizmin” thotë ajo. “Ne, gratë, jemi të forta. Ne japim jetë — dhe kjo është gjëja më e vështirë që ekziston.”

Ambicia e saj është të sjellë më shumë stilistë dhe modele shqiptare në skenat ndërkombëtare. “Dua që bota të njohë rrënjët tona, muzikën, traditat dhe bukurinë shqiptare” shton ajo.

Por mesazhi i saj për çdo grua dhe çdo të ri që ëndërron të arrijë diçka të madhe mbetet i njëjtë:
“Mos hiqni dorë kurrë.”