Diamant Hysenaj, sipërmarrësi shqiptaro-amerikan 42-vjeçar nga Gjakova e Kosovës, ka hyrë në një prej garave më të vështira politike në SHBA, duke kandiduar për Kongres në Distriktin 14 të Nju Jorkut përballë Alexandria Ocasio-Cortez. Në një intervistë dhënë Gazeta Dielli, Hysenaj shpalosi vizionin e tij politik, historinë e familjes dhe arsyet pse komuniteti duhet ta mbështesë.

Historia e tij fillon në Kosovën e shkatërruar nga lufta. Në vitin 1991, vetëm nëntë vjeç, ai u largua me nënën dhe motrën për t’iu bashkuar babait në Bronx. Rritja në varfëri, pa e ditur gjuhën dhe kulturën, ishte një sfidë, por njëkohësisht edhe një mundësi. Në moshën 11-vjeçare shpërndante gazeta dhe marshonte për lirinë e Kosovës. Më vonë, pasi humbi shtëpinë gjatë krizës financiare të vitit 2008, themeloi DCG New York Inc., një kompani pasurish të paluajtshme që sot menaxhon mbi 400 milionë dollarë dhe ka zhvilluar mbi një milion këmbë katrore pronë. Për Hysenajn, kjo histori është dëshmi e ëndrrës amerikane. “Asgjë e dhënë, gjithçka e fituar,” është motoja që e udhëheq.

Ai thotë se nuk po kandidon për pushtet apo pasuri, sepse të dyja i ka arritur, por për të shërbyer dhe për të luftuar për familjet e distriktit të tij. Platforma e tij fokusohet në përballueshmëri, siguri dhe mundësi. Ai premton ulje të taksave dhe kostos së banimit, heqje të burokracisë së panevojshme, mbështetje për policinë, reforma në emigracion me kufij të sigurt, si dhe kujdes shëndetësor më të gjerë pa, siç thotë ai, “mbingarkesë socialiste.” Për të, Nju Jorku duhet të jetë kryeqyteti i mundësive, jo “një shembull i rënies nga politikat e dështuara.”

Ai kritikon Ocasio-Cortez për largimin e Amazon nga Nju Jorku, duke thënë se humbi 30 mijë vende pune dhe se ka kthyer distriktin në skenë spektaklesh politike, ndërsa lagjet vuajnë nga kosto e lartë dhe krimi në rritje. “Mjaft është mjaft,” thotë Hysenaj.

Një pjesë qendrore e mesazhit të tij u drejtohet shqiptaro-amerikanëve. Ai bën thirrje për unitet dhe për ta përdorur fuqinë e tyre si bllok votues, duke kujtuar rezistencën shqiptare ndër shekuj, nga Dardania e lashtë deri te lufta për Kosovën. “Ne jemi një popull i fortë dhe krenar. Sot duhet të qëndrojmë përsëri të bashkuar për të shpëtuar NY-14 nga rënia.”

Përtej politikës, Hysenaj flet hapur edhe për jetën personale. Është i martuar me Terezën dhe ka dy fëmijë, Logan dhe Nora. Familja e tij, thotë, është frymëzimi më i madh, dhe çdo ditë përpiqet të ruajë traditat shqiptare te fëmijët e tij, duke i mësuar njëkohësisht të vlerësojnë mundësitë dhe liritë amerikane. Ai është pasionant për makinat sportive moderne, ndjek licencën e pilotit dhe udhëton shpesh, sidomos në Kosovë, për të qëndruar i lidhur me rrënjët.

Sa i përket fushatës, thotë se ajo po forcohet çdo ditë, e mbështetur nga familjet punëtore që kërkojnë ndryshim. Strategjia e tij është lidhja direkte me komunitetin përmes takimeve derë më derë, forumeve publike dhe një plani të qartë për rikthimin e përballueshmërisë dhe sigurisë. Për votuesit e pavendosur, ai ofron historinë e tij si dëshmi të vendosmërisë. “Kam jetuar atë që keni jetuar ju. Kam përballuar varfëri, sfida dhe pengesa, por nuk jam dorëzuar kurrë dhe as nuk do të dorëzohem. Nuk po kandidoj për para apo pushtet, por për të shërbyer, për të luftuar për familjet dhe për të qenë zëri i shumicës së heshtur që ende beson në ëndrrën amerikane.”

Nga një djalosh refugjat i Kosovës te një sipërmarrës i suksesshëm në Nju Jork dhe tani kandidat për Kongres, Diamant Hysenaj e sheh kandidaturën e tij si vazhdimësi të një rruge jetësore të formuar nga rezistenca, mundësitë dhe besimi se me punë të palodhur çdo gjë është e arritshme. Ai thotë se është gati t’i japë Distriktit 14 të Nju Jorkut “një zë të fortë, të guximshëm dhe autentik në Kongres,” që përfaqëson njëkohësisht ëndrrën e tij amerikane dhe krenarinë shqiptare.