Astronomja nga Kosova, Pranvera Hyseni, ka shënuar një arritje të jashtëzakonshme në fushën e shkencës, duke u shpërblyer nga Universiteti i Kalifornisë, Santa Cruz, me çmimin vjetor për propozimin më të mirë të doktoraturës në Departamentin e Shkencave Planetare. Ky është një nga nderimet më të larta akademike në këtë fushë dhe jepet vetëm një herë në vit për projektin më premtues kërkimor.

Çmimi, i shoqëruar me një grant prej 3,000 dollarësh, e vendos Hysenin në mesin e emrave më të spikatur të astronomisë planetare. Kërkimet e saj fokusohen tek asteroidët dhe trupat e vegjël të Sistemit Diellor, veçanërisht ata që përmbajnë ujë dhe përbërje organike. Ajo kombinon eksperimentet laboratorike me vëzhgimet përmes teleskopëve dhe modelimet teorike, për të kuptuar proceset e transformimit të materialeve dhe shpërndarjen e ujit në fazat e hershme të sistemit tonë diellor.

“Ky çmim nuk është vetëm një arritje personale, por edhe një dëshmi se pasioni për shkencë nuk njeh kufij gjeografikë” tha Hyseni, duke falënderuar komisionin vlerësues dhe kolegët për mbështetjen.

Ky sukses është një tjetër histori frymëzuese për shkencën kosovare dhe një motivim i fortë për të rinjtë që duan të ndjekin fushat STEM.