Kosova ka shprehur gatishmërinë për të marrë pjesë në një mision ndërkombëtar paqeruajtës në Gazë, ka konfirmuar kryeministri Albin Kurti, duke theksuar rolin gjithnjë e më të madh të Forcës së Sigurisë së Kosovës (FSK) në përpjekjet globale për paqe dhe siguri.
Duke folur për angazhimet ndërkombëtare të Kosovës, Kurti deklaroi se vendi është i gatshëm të kontribuojë në Forcën Ndërkombëtare të Stabilizimit për Gazën, një mision shumëkombësh që pritet të funksionojë nën mandatin e Kombeve të Bashkuara. Ai theksoi se FSK-ja tashmë njihet ndërkombëtarisht për kapacitetet në kërkim-shpëtim, deminim dhe pjesëmarrje në misione të mëparshme jashtë vendit.
“Kudo që ka nevojë për paqe në botë, ne dëshirojmë të kontribuojmë,” tha Kurti, duke shtuar se Kosova vetë ka qenë përfituese e paqes përmes forcave ndërkombëtare dhe tani synon të japë kontributin e saj me kapacitetet shtetërore.
Ai bëri të ditur se angazhimi i Kosovës në Gazë është pjesë e një procesi të vazhdueshëm, duke rikujtuar se Qeveria e Kosovës ka ndarë tashmë 500 mijë euro ndihmë humanitare për Gazën dhe se ky proces do të vazhdojë edhe në të ardhmen.
Kurti përmendi gjithashtu një konferencë të mbajtur në Doha në dhjetor 2025, e organizuar nga Komanda Qendrore e Shteteve të Bashkuara, ku u diskutua roli dhe struktura e Forcës Ndërkombëtare të Stabilizimit. Sipas informacioneve të deritanishme, kjo forcë do të ketë përgjegjësi për garantimin e sigurisë dhe mbikëqyrjen e armëpushimit në Gazë.
Shtëpia e Bardhë ka njoftuar se misioni do të udhëhiqet nga gjeneralmajori amerikan Jasper Jeffers, si pjesë e një përpjekjeje të gjerë ndërkombëtare për stabilizimin e rajonit.
