Një donacion prej 10 mijë dollarësh nga komuniteti shqiptaro-amerikan në SHBA i është dhuruar sot Bibliotekës së Fëmijëve në Pallatin e Rinisë në Prishtinë. Donacioni, i mundësuar nga organizata The Library Project Kosova, u prezantua nga filantropja dhe humanistja Emina Çunmulaj.

Kryetari i Prishtinës, Përparim Rama, e cilësoi këtë një hap të madh për fëmijët e kryeqytetit:
“Falënderoj shumë Emina Çunmulajn që erdhi nga Amerika për të na sjellë këtë donacion të mrekullueshëm nga komuniteti shqiptaro-amerikan. Në një kohë digjitale kur fëmijët kalojnë orë të tëra para ekraneve, një hapësirë e tillë është parajsë për kreativitet dhe shëndet.”

Nga ana e saj, Emina tha:
“The Library Project Kosova synon t’i bëjë fëmijët të dashurohen me librin dhe të krijojë një hapësirë kreative. Për këtë kemi trajnuar fëmijët dhe mësuesit me metoda atraktive që i nxisin drejt leximit.”

Ky kontribut është pjesë e fushatës “Biblioteka na bashkon – bëhu pjesë e krijimit”, që po bashkon shqiptarë nga mbarë bota për të realizuar bibliotekën e parë të fëmijëve në Kosovë.

Vetëm pak ditë më parë, shkencëtarja prishtinase në Harvard, Drenusha Krasniqi Vanmeter, mobilizoi rrjetin e bibliotekave të Bostonit për të dërguar një kontejner me libra në Prishtinë — një nismë e mbështetur fuqishëm nga Kristale Ivezaj Rama, bashkëshortja e kryetarit të Prishtinës dhe iniciatorja e projektit të Bibliotekës së Fëmijëve.