Një shqiptar nga Kosova, i cili ishte paraqitur në videoklipin e reperit me famë botërore Drake, është rikthyer në vëmendje pas raportimeve të fundit që zbulojnë një të kaluar të thellë kriminale në Shtetet e Bashkuara dhe dyshime për përfshirje në rrjete të krimit të organizuar.

Sipas të dhënave të publikuara nga Organized Crime and Corruption Reporting Project (OCCRP), bëhet fjalë për Hamdi Latajn, 62 vjeç, i cili sot jeton në një nga ndërtesat më luksoze në Toronto dhe shfaq një stil jete të pasur — me makina luksoze, vende VIP në ndeshjet e Toronto Raptors dhe prezencë në rrjetet sociale.

Ai u bë i njohur për publikun pasi u shfaq në videoklipin e vitit 2023 të Drake për këngën “Polar Opposites”, të publikuar më 29 nëntor 2023. Në video, Lataj shihet duke qeshur dhe biseduar me reperin në një ambient të errët që i ngjan një salle lojërash fati, ndërsa personazhet mbajnë xhaketa të kuqe me simbolin e shqiponjës shqiptare. Videoklipi ka grumbulluar rreth 9.7 milionë shikime në YouTube, por përfshirja e tij ka marrë vëmendje vetëm tani.

Nuk dihet nëse Drake ka qenë në dijeni për të kaluarën e tij. As reperi dhe as Lataj nuk kanë komentuar publikisht, ndërsa përfaqësuesit e Drake nuk iu përgjigjën kërkesave të përsëritura për koment.

Megjithatë, e kaluara e Latajt është e ngarkuar me çështje penale. Ai kishte hyrë ilegalisht në SHBA në vitin 1986 dhe kishte dështuar në një kërkesë për azil. Gjatë qëndrimit atje, ai krijoi një dosje kriminale, përfshirë një rast në vitin 2001 për komplot për vjedhje banke në Brooklyn, New York.

Sipas dokumenteve gjyqësore, Lataj ishte pjesë e një grupi emigrantësh nga ish-Jugosllavia dhe Shqipëria që planifikonin dhe kryenin grabitje bankash dhe biznesesh në zonën e New York-ut. Në rastin e vitit 2001, grupi tentoi të hynte në një bankë duke çarë çatinë, por Lataj u arrestua teksa po largohej me makinën e tij Cadillac. Ai u dënua me dy vjet burg federal dhe pas lirimit në vitin 2003 u përball sërish me procedura deportimi.

Në një aktakuzë të vitit 2013 në SHBA, emri i tij u përmend në një rast që lidhej me trafikim droge dhe pastrim parash, ku përfshihej edhe i dyshuari për bos krimi Arif Kurti. Megjithatë, Lataj nuk u gjykua në këtë rast dhe emri i tij më vonë u hoq nga dokumentet publike.

Pas kësaj, ai besohet të jetë zhvendosur në Kanada, ku, megjithëse nuk ka dënime penale, është përmendur në disa hetime të policisë.

Një dokument i Policisë Mbretërore Kanadeze (RCMP) i vitit 2016 tregon se Lataj dyshohej për trafikim kokaine, madje së bashku me Joaquín “El Chapo” Guzmán, një nga trafikantët më të njohur të drogës në botë. Sipas dokumentit, autoritetet kishin “arsye të bazuara” për të besuar se ai ishte i përfshirë në këtë aktivitet, por nuk ka prova se ai është akuzuar apo dënuar për këtë në Kanada.

Në një tjetër hetim të njohur si “Project Hobart”, autoritetet në Ontario e kishin vendosur nën vëzhgim si pjesë e një rrjeti të dyshuar për baste sportive ilegale dhe pastrim parash, ku përfshiheshin edhe persona të lidhur me Hells Angels dhe mafien italiane ‘Ndrangheta. Edhe në këtë rast, ai nuk rezulton i akuzuar.

Pavarësisht kësaj të kaluare, Lataj sot jeton një jetë të pasur. Dokumentet tregojnë se ai ka kompani të regjistruara në një penthouse luksoz në qendër të Torontos, ku qiratë arrijnë mbi 11 mijë dollarë në muaj. Ai shpesh publikon fotografi me makina që vlejnë qindra mijëra dollarë dhe është parë pranë fushës në ndeshjet e Raptors, madje edhe pranë ish-yllit Kyle Lowry gjatë suksesit të ekipit në vitin 2019.

Në të njëjtën kohë, ai ka bërë donacione prej rreth 200 mijë euro për projekte në Kosovë.

Analistët thonë se prania e tij në një videoklip me Drake mund të ketë qenë një përpjekje për të krijuar “kredibilitet” në botën e hip-hop-it, veçanërisht në kontekstin e rivalitetit të reperit me Kendrick Lamar.

“Ai nuk është artist i rrugës, por përpiqet të duket i tillë”, ka thënë më herët Lamar në një nga këngët e tij, duke kritikuar Drake.