Shqipëria është renditur si vendi i katërt në botë për përdorimin më të lartë të parasë fizike, sipas një analize globale të publikuar së fundi dhe të cituar nga disa media financiare. Të dhënat tregojnë se rreth 90% e pagesave në vend vazhdojnë të kryhen me para në dorë.

Raporti tregon se Shqipëria mbetet shumë prapa standardeve evropiane në përdorimin e pagesave dixhitale dhe shërbimeve bankare. Kjo diferencë po kthehet në shqetësim serioz teksa vendi synon integrim më të thellë ekonomik me Bashkimin Evropian.

Sipas ekspertëve, varësia kaq e lartë nga paraja fizike lidhet me disa faktorë. Shumë qytetarë ende nuk kanë qasje ose nuk përdorin aktivisht shërbimet bankare. Zonat rurale përballen me internet të dobët. Shumë biznese të vogla nuk kanë POS. Ekonomia informale është e përhapur. Dhe në aspekt kulturor, shumë shqiptarë vazhdojnë t’i besojnë më shumë parasë në dorë sesa sistemeve dixhitale.

Analistët paralajmërojnë se kjo varësi e theksuar nga cash-i e vështirëson mbledhjen e taksave dhe ndihmon ekonominë informale të rritet. Besohet se miliarda euro qarkullojnë jashtë sistemit bankar, duke kufizuar transparencën dhe ngadalësuar zhvillimin ekonomik.

Autoritetet kanë paralajmëruar hapa për uljen e përdorimit të parasë në dorë, përfshirë rritjen e aksesit në pajisje POS dhe vendosjen e kufizimeve për pagesat e mëdha në cash. Kryeministri Edi Rama ka shprehur më herët synimin që Shqipëria të lëvizë drejt një modeli “pa para fizike” në dekadën e ardhshme, edhe pse ekspertët thonë se duhen reforma të thella që ky objektiv të bëhet realitet.