Bashkia e Vlorës ka nderuar inxhinieren dhe sipërmarrësen shqiptare me famë botërore, Mira Murati, me titullin “Qytetare Nderi.”

Në një ceremoni solemne të mbajtur në Teatrin “Petro Marko”, Murati u vlerësua për kontributin e saj të jashtëzakonshëm në fushën e teknologjisë, inteligjencës artificiale dhe inovacionit global.

Murati, e cila ka drejtuar kompaninë prestigjioze OpenAI dhe aktualisht udhëheq laboratorin e saj Thinking Machines Lab, u nderua për lidershipin dhe për mënyrën se si ka promovuar vlerat shqiptare në arenën ndërkombëtare.

Për shkak të angazhimeve jashtë vendit, ajo nuk ishte e pranishme në ceremoni. Titullin e mori në emër të saj nëna e saj, e cila falënderoi Bashkinë e Vlorës:

“Faleminderit Vlorës, qytetit ku Mira lindi dhe u rrit. Edhe pse jeton jashtë, ajo e ndjek me dashuri çdo zhvillim në Shqipëri dhe në qytetin e saj të lindjes. Si familje, jemi thellësisht mirënjohës për këtë vlerësim.” – tha ajo.

Në të njëjtën ceremoni, me titullin “Qytetar Nderi” u nderua edhe tenori i njohur Josif Gjipali, për kontributin e tij të çmuar në artin dhe kulturën shqiptare.

Ngjarja u ndoq nga drejtues vendorë, personalitete dhe qytetarë të shumtë, të cilët duartrokitën figurat që kanë lartësuar emrin e Vlorës në nivel kombëtar dhe ndërkombëtar.