Ivanka Trump, vajza e presidentit amerikan Donald Trump, ka zhvilluar një vizitë të paparalajmëruar në Shqipëri, e cila lidhet drejtpërdrejt me planet e investimit në ishullin e Sazanit. Ajo ka mbërritur në Vlorë nën masa të rrepta sigurie, e shoqëruar nga një delegacion dhe forca të shumta policore, ndërsa lëvizjet e saj janë monitoruar gjatë gjithë qëndrimit.
Gjatë vizitës në Vlorë, Ivanka Trump ka marrë pjesë në takime teknike, të cilat sipas raportimeve janë fokusuar në aspektet arkitekturore dhe mënyrën e realizimit të projektit të planifikuar në ishullin strategjik të Sazanit. Nuk ka pasur njoftime për takime me përfaqësues të pushtetit vendor apo qendror, ndërsa fokusi ka qenë ekskluzivisht në diskutime profesionale rreth projektit.
Në axhendën e saj ka qenë edhe zona e Ujit të Ftohtë, si dhe një ndalesë në Akerni, e njohur si një nga zonat më të braktisura pas viteve ’90. Atje është bërë një vlerësim nga afër i vijës bregdetare, hapësirave përreth dhe infrastrukturës ekzistuese, me synimin për të analizuar potencialin zhvillimor të territorit. Akernia konsiderohet zonë me interes të lartë për investime strategjike dhe turizëm elitar, veçanërisht për shkak të pozicionit gjeografik dhe afërsisë me aeroportin e ri, faktorë që kanë ndikuar edhe në rritjen e çmimeve të pronave vitet e fundit.
Vizita e Ivanka Trump lidhet me projektin e kompanisë së Jared Kushner, bashkëshortit të saj, e cila në fund të vitit 2024 ka përfituar statusin e investitorit strategjik në Shqipëri për zhvillimin e një resorti turistik në ishullin e Sazanit. Ky status i jep kompanisë të drejtën të përfitojë nga procedura të përshpejtuara dhe lehtësi të tjera ligjore për një periudhë 10-vjeçare, ndërsa shteti shqiptar ruan të drejtën e rishikimit ose revokimit të vendimit në varësi të negociatave përfundimtare.
Ishulli i Sazanit është aktualisht kryesisht i braktisur, me status ushtarak dhe i hapur vetëm pjesërisht për publikun. Planet për zhvillimin e tij, si dhe interesimi për zona të tjera përreth Vlorës, kanë nxitur debat dhe kundërshtime, sidomos nga ambientalistët që paralajmërojnë për rreziqe ndaj zonave të mbrojtura bregdetare.
