Kosova dhe Shqipëria janë ftuar zyrtarisht t’i bashkohen një nisme të re ndërkombëtare të quajtur “Bordi i Paqes,” e iniciuar nga Presidenti i SHBA-së, Donald J. Trump, sipas letrave zyrtare të dërguara nga Shtëpia e Bardhë.

Në një letër të datës 20 janar 2026, drejtuar Presidentes Vjosa Osmani, Trump e fton Republikën e Kosovës që të bëhet Shtet Anëtar Themelues i Bordit të Paqes, duke e cilësuar këtë nismë si një përpjekje historike globale për vendosjen e paqes së qëndrueshme, prosperitetit dhe bashkëpunimit ndërkombëtar.

Një letër e njëjtë i është dërguar më herët edhe Kryeministrit të Shqipërisë, Edi Rama, më 16 janar 2026, duke ftuar Shqipërinë që të marrë pjesë si anëtare themeluese, çka tregon përfshirjen e përbashkët të të dyja shteteve shqiptare në këtë iniciativë.

Sipas përmbajtjes së letrave, Bordi i Paqes parashihet të funksionojë si një organizatë e re ndërkombëtare, e cila do të bashkojë shtete të përzgjedhura të gatshme të udhëheqin përpjekjet globale për paqe dhe zgjidhje konfliktesh. Shtetet anëtare do të përfaqësohen në nivel të lartë dhe mund të caktojnë përfaqësues të autorizuar për pjesëmarrje.

Nisma lidhet me Planin Gjithëpërfshirës për t’i dhënë fund konfliktit në Gaza, një plan me 20 pika i shpallur nga Trump në shtator 2025, për të cilin ai thotë se ka marrë mbështetje të gjerë ndërkombëtare dhe është mirëpritur nga Këshilli i Sigurimit i OKB-së përmes Rezolutës 2803.

Ende nuk ka informacione zyrtare për takimin e parë, vendin apo strukturën përfundimtare të Bordit, por ftesat për Kosovën dhe Shqipërinë përbëjnë një zhvillim të rëndësishëm diplomatik dhe i pozicionojnë të dyja vendet në mesin e shteteve themeluese të kësaj nisme.