Policia e Shtetit akuzohet se ka qëlluar me plumba gome ndaj studentëve që protestonin të shtunën para Ministrisë së Arsimit në Tiranë, në ditën e pestë të lëvizjes që kërkon dorëheqjen e kryeministrit Edi Rama.

Sipas gazetarëve në terren, një efektiv i vendosur pranë ministrisë qëlloi drejt turmës me një armë të posaçme për plumba gome. Mediat raportuan se një protestues u godit në gjoks dhe një tjetër në këmbë, ndërsa pamjet e Top Channel duket se tregojnë një polic duke e mbushur armën dhe duke qëlluar.

Një i ri shfaqi para kamerave gjoksin e gjakosur dhe plumbin që, sipas tij, e kishte goditur. Gazetarja Klodiana Lala tregoi një gëzhojë të gjetur në vendngjarje.

Policia nuk e ka konfirmuar zyrtarisht përdorimin e plumbave të gomës. Burime policore i thanë gazetares Dorjana Bezat se efektivët përdorën mjete shpërqendruese. Nëse konfirmohet, do të ishte hera e parë që nga fillimi i protestave, pasi deri më tani policia kishte përdorur vetëm gaz lotsjellës dhe autobotë uji.

Udhëzimi i OKB-së për armët më pak vdekjeprurëse në zbatimin e ligjit, i vitit 2020, përcakton në pikën 7.5.8 se predhat goditëse, përfshirë plumbat e gomës, nuk duhet të drejtohen në kokë, fytyrë apo qafë. Sipas të njëjtit dokument, ato përdoren vetëm ndaj individëve të dhunshëm, duke synuar pjesën e poshtme të barkut ose këmbët, dhe vetëm kur ka rrezik të menjëhershëm lëndimi. Udhëzimi nuk lejon qitjen pa dallim drejt turmës: armët që mund të drejtohen individualisht duhet të synojnë vetëm ata që kryejnë akte dhune.

Mijëra të rinj u mblodhën të shtunën para ministrisë, sipas Reuters. Situata u përshkallëzua kur një grup të rinjsh të maskuar hodhën gurë dhe molotovë drejt policisë, e cila u përgjigj me granata shurdhuese, gaz lotsjellës dhe ujë me presion. Një polic u dërgua në spital me ambulancë.

Protesta nisi të martën nga studentët, të pakënaqur me kushtet në universitete, koston e studimeve dhe të jetesës, por shpejt u kthye në një revoltë kundër qeverisë. Ajo është përhapur tashmë edhe në Durrës, Elbasan, Korçë e qytete të tjera.

Vetëm të premten, 21 persona morën trajtim në Spitalin e Traumës në Tiranë: tetë policë, dhjetë protestues, mes tyre tre të mitur, dhe tre kalimtarë. Policia arrestoi 10 persona atë ditë, ndërsa që nga e marta janë arrestuar dhjetëra të tjerë, përfshirë të mitur 15 deri në 17 vjeç.

Më herët gjatë javës, drejtori i Policisë së Shtetit pezulloi katër efektivë dhe shefin e Rendit të një komisariati, pasi u publikua video e një 19-vjeçari me këmbë të thyer që tërhiqej ashpër nga policët. Agjencia e Mbikëqyrjes Policore thotë se po verifikon çdo shkelje ligjore të punonjësve të policisë.

Rama, i cili fitoi mandatin e katërt vitin e kaluar me premtimin për ta çuar Shqipërinë në BE që në vitin 2028, refuzon të japë dorëheqjen. “Kishim zgjedhje vitin e kaluar, jo revolucion,” i tha ai Reuters. Të premten ai fajësoi “duar të huaja” për trazirat, duke këmbëngulur se nuk bëhet fjalë për një fenomen studentor, ndërsa të shtunën deklaroi se qeveria i respekton studentët dhe do ta mbrojë të drejtën e tyre për të protestuar.

Protestat vijnë pas një vere demonstratash kundër një resorti luksoz në bregdetin jugor të Shqipërisë, projekt i mbështetur nga Jared Kushner.