Rezultatet preliminare të publikuara nga disa media në Luginën e Preshevës thonë se Shaip Kamberi ka marrë votat e nevojshme nga një vendvotim në Tërnoc të Bujanocit, ku ka pasur  rivotim. Tashmë ai pritet të jetë i vetmi deputet shqiptar në Kuvendin e Serbisë.

Shaip Kamberi ka shkruar në Facebook pas fitimit të mandatit të deputetit në Kuvendin e Serbisë. Ai falënderoi të gjithë ata që dolën për ta votuar për të, ndërsa shtoi se ai do të jetë zëri i të gjithë shqiptarëve në Serbi pa dallim.

“Faleminderit pafund për qytetarët e lagjes së Strukarëve që përtej bindjeve të tyre politike, sot votuan për përfaqësimin e shqiptarëve. Njëzëri. Faleminderit partnerëve të Koalicionit të Shqiptarëve të Luginës për angazhimin, përkushtimin dhe betejën që drejtuam dhe fituan së bashku.Falënderoj edhe subjektet tjera politike që veprojnë në Bujanoc, të cilat me të drejtë dëgjuan nevojën e popullit shqiptar për vazhdimin e përfaqësimit parlamentar”, ka shkruar ai.