Kryeministri i Shqipërisë Edi Rama ka dalë sot në një deklaratë të gjatë publike duke mbrojtur projektin e madh turistik në zonën mes Lagunës së Nartës dhe plazhit të Zvërnecit, në një kohë kur protesta dhe debatet për rrethimin e bregdetit kanë marrë vëmendje të gjerë në vend.

Deklarata e tij vjen pas pamjeve që u shpërndanë në rrjetet sociale, ku një protestues shihet duke u tërhequr zvarrë brenda perimetrit të rrethuar nga persona të dyshuar si roje private sigurie. Rama e cilësoi ngjarjen si “të neveritshme” dhe tha se Policia e Shtetit duhet të kishte ndërhyrë menjëherë.

Ai konfirmoi se kompania e sigurisë private është hequr nga operimi në Shqipëri, ndërsa punonjësit e përfshirë janë arrestuar ose janë nën hetim. Sipas tij, është shkarkuar edhe drejtori i Policisë së Vlorës dhe e gjithë zinxhiri komandues është vënë nën hetim. Po ashtu, kompania që ka vendosur gardhin me tela me gjemba do të përballet me gjoba të rënda financiare.

Rama theksoi se projekti nuk ka marrë ende lejen përfundimtare të ndërtimit dhe se nuk ekziston ende një projekt arkitektonik final i miratuar. Sipas tij, aktualisht bëhet fjalë vetëm për leje zhvillimi dhe për fazën e studimeve teknike dhe mjedisore.

Sipas qeverisë, projekti përfshin rreth 300 hektarë tokë private në zonën mes Lagunës së Nartës dhe Zvërnecit, dhe nuk prek pronë shtetërore. Ai tha se rrethimi është bërë në kuadër të mbrojtjes së pronës private dhe procesit të studimeve.

Rama bëri të ditur se investitorët e lidhur me Jared Kushner kanë shfaqur interes që në vitin 2023, ndërsa një version i mëparshëm i projektit është rrëzuar nga autoritetet shqiptare. Ai shtoi se aktualisht janë duke punuar pesë studio ndërkombëtare arkitekture për një masterplan të ri, përfshirë ekipe të drejtuara nga Kengo Kuma dhe Jean Nouvel, ndërsa studimet mjedisore janë ende në proces.

Sipas tij, laguna nuk preket nga ndërtimet dhe planet për marinë janë hequr nga projekti pas kërkesave të qeverisë.

Në fjalimin e tij, Rama gjithashtu hodhi poshtë disa narrativa që qarkullojnë në rrjet për përfshirje të grupeve fetare apo shteteve të huaja në projekt, duke i cilësuar ato si dezinformata. Ai përmendi edhe reagimet nga Greqia lidhur me çështjet mjedisore, duke sugjeruar se disa prej tyre janë të ndikuara politikisht.

Rama theksoi se projekti mund të arrijë një investim prej rreth 4 miliardë eurosh dhe të krijojë rreth 10,000 vende pune, duke përfshirë edhe interesimin e disa prej markave më të mëdha të hotelerisë në botë.

Ai argumentoi se Shqipëria duhet të kalojë drejt turizmit të nivelit të lartë dhe të konkurrojë me destinacione si Costa Navarino në Greqi dhe Porto Montenegro në Mal të Zi.