Prishtina ka hequr flamurin gjigant me mbishkrimin “Free Ukraine” nga Grand Hotel, vetëm një ditë pasi presidenti ukrainas Volodymyr Zelensky rikonfirmoi gjatë vizitës së tij në Serbi se qëndrimi i Ukrainës për Kosovën nuk ka ndryshuar.

Flamuri ukrainas dhe mbishkrimi “Free Ukraine” ishin vendosur prej vitesh në Grand Hotel, në qendër të Prishtinës, si simbol i solidaritetit të Kosovës me Ukrainën pas nisjes së pushtimit rus.

Zelensky i bëri deklaratat të shtunën gjatë një konference të përbashkët për media me presidentin serb Aleksandar Vuçiq në Beograd. Ai tha se Ukraina respekton integritetin territorial të Serbisë dhe se qëndrimi i Kievit për mosnjohjen e Kosovës mbetet i pandryshuar.

Të dielën, kryetari i Prishtinës, Përparim Rama, publikoi pamje nga largimi i banderolës nga Grand Hotel.

“Shteti i Kosovës duhet të respektohet. Kur Kosova nuk respektohet, kryeqyteti, Prishtina përgjigjet gjithmonë njëjtë”, shkroi Rama.

Rama theksoi se solidariteti i Kosovës me popujt që përballen me luftë, dhunë dhe persekutim mbetet i palëkundur.

“Empatia dhe solidariteti ynë do të jenë gjithmonë me popujt që përballen me luftë, dhunë e persekutim. Sepse ne, më mirë se shumë të tjerë, e dimë çfarë do të thotë të luftosh për liri, dinjitet dhe të drejtën për të ekzistuar si shtet”, shkroi Rama.

“Por asnjë kauzë dhe asnjë politikë nuk mund të ndërtohet duke nënçmuar shtetësinë e Kosovës dhe sakrificën e popullit të saj”, shtoi ai.

Heqja e flamurit vjen pas vitesh të mbështetjes së dukshme të Prishtinës për Ukrainën. “Free Ukraine” ishte bërë një prej simboleve më të njohura të solidaritetit të kryeqytetit me popullin ukrainas.