Kanë nisur zyrtarisht fluturimet direkte mes Tiranës dhe Torontos, duke shënuar lidhjen e parë ajrore pa ndalesë mes Shqipërisë dhe Amerikës së Veriut dhe duke hapur një linjë të re transatlantike për vendin.
Air Transat e inauguroi shërbimin më 18 qershor me fluturimin TS422 nga Toronto drejt Tiranës, duke vendosur një operim javor çdo të enjte deri më 8 tetor. Linja operohet me avionë Airbus A330-200 të konfiguruar në Economy dhe Club Class.
Hapja e kësaj linje konsiderohet një moment historik për aviacionin shqiptar, pasi për herë të parë krijohet një lidhje direkte ajrore me Amerikën e Veriut. Kjo pritet t’i shërbejë si diasporës shqiptare në Kanada dhe SHBA, ashtu edhe rritjes së fluksit turistik drejt Shqipërisë gjatë sezonit veror.
Sipas të dhënave të mëhershme të aeroporteve, mes Tiranës dhe Torontos qarkullojnë dhjetëra mijëra pasagjerë çdo vit përmes lidhjeve indirekte, duke e bërë këtë linjë një kërkesë të hershme të tregut. Autoritetet e aviacionit e kanë cilësuar këtë zhvillim si një hap strategjik që rrit ndërlidhjen ndërkombëtare të Shqipërisë dhe forcon pozicionin e Tiranës në rrjetin transatlantik.
Air Transat e ka përfshirë këtë destinacion në zgjerimin e saj veror, ku përfshihen linja të reja dhe rritje frekuencash në rrjetin ndërkontinental. Kompania ka theksuar atraktivitetin në rritje të Shqipërisë si destinacion mesdhetar me çmime të përballueshme, bregdet dhe trashëgimi kulturore.
Zyrtarë nga Kanadaja dhe Shqipëria kanë theksuar më herët rëndësinë e marrëveshjes bilaterale të transportit ajror, duke e konsideruar këtë linjë si një hap që forcon lidhjet ekonomike, kulturore dhe ato të diasporës mes dy vendeve.
