Qyteti Wylie në Teksas ka zyrtarizuar Mitrovicën e Veriut si qytetin e tij të ri simotër, një vendim i mundësuar nga shqiptaro-amerikani Gino Mulliqi. Mulliqi, anëtar i Këshillit Shqiptaro-Amerikan dhe shqiptari i parë i zgjedhur ndonjëherë në detyrë publike në shtetin e Teksasit, e prezantoi këtë iniciativë që u miratua me një shpallje ceremoniale nga kryetari i Bashkisë, Matthew Porter, në emër të Këshillit dhe komunitetit lokal.

Sipas dokumentit zyrtar, shpallja nënvizon rëndësinë e forcimit të vullnetit të mirë ndërkombëtar, të shkëmbimeve kulturore dhe të bashkëpunimit mes komuniteteve në të gjithë botën. Të dy qytetet theksojnë vlerat e përbashkëta të lirisë dhe demokracisë, të cilat i konsiderojnë themel për zhvillim afatgjatë dhe paqe të qëndrueshme. Marrëdhënia e re synon krijimin e urave të bashkëpunimit në fusha si kultura, arsimi dhe ekonomia, duke nxitur dialogun, angazhimin qytetar dhe respektin për dinjitetin njerëzor.

Zyrtarët bënë të ditur se vendimi ka karakter tërësisht ceremonial dhe nuk krijon obligime financiare për qytetin e Wylie-s. Megjithatë, ky hap simbolik i vendos Wylie-n dhe Mitrovicën e Veriut në një kapitull të ri bashkëpunimi, me pritshmëri për mundësi të përbashkëta dhe një partneritet të mbështetur në respekt, komunikim dhe vlera demokratike të përbashkëta.