Kosova pritet të nisë prodhimin e parë të municionit “Made in Kosova” në fund të vitit 2026, duke hyrë për herë të parë në industrinë strategjike të prodhimit të armëve. Ky është një prej projekteve më të mëdha të mbrojtjes që vendi ka ndërmarrë ndonjëherë.

Fabrika e municioneve do të ndërtohet në Gjakovë, në hapësirat e ish-Kombinatit “Ereniku”, një zonë prej mbi 100 hektarësh që do të shpronësohet dhe do t’i kalojë Ministrisë së Mbrojtjes. Kjo zonë industriale do të jetë ekskluzivisht e dedikuar për prodhimin e municionit, por me mundësi që më vonë të zgjerohet edhe për projekte të tjera të teknologjisë së mbrojtjes.

Ky projekt u bë i mundur pas marrëveshjes që Kosova nënshkroi më 16 dhjetor 2024 me kompaninë shtetërore turke të armëve MKE. Marrëveshja përfshin ndërtimin e fabrikës, instalimin e makinerive, trajnimin e stafit kosovar dhe vendosjen e standardeve të prodhimit sipas kërkesave të NATO-s. Makineritë dhe linjat teknike tashmë janë në prodhim në Turqi.

Projekti vjen në kohën kur buxheti i Mbrojtjes për vitin 2025 është rritur në 207.8 milionë euro, një shtesë prej 54 milionë eurosh krahasuar me vitin 2024. Kjo rritje tregon qartë orientimin e Kosovës drejt forcimit të kapaciteteve ushtarake dhe zhvillimit të industrisë vendore të mbrojtjes.

Kryeministri në detyrë, Albin Kurti, ka deklaruar se prodhimi i municionit në vend do ta rrisë sigurinë e Kosovës dhe do ta bëjë ushtrinë më të pavarur. Ndërkohë, ministri në detyrë i Mbrojtjes, Ejup Maqedonci, ka konfirmuar se fabrika do të jetë funksionale dhe gati për prodhim jo më vonë se fundi i vitit 2026. Sipas tij, kjo zonë industriale do të hapë rrugë edhe për projekte të tjera strategjike, përfshirë dronët civilë dhe ushtarakë “Made in Kosova”.