Kosova po përgatitet të ngrejë një industri të plotë vendore të mbrojtjes, që shkon shumë përtej municioneve, sipas draftit të një koncept-dokumenti të finalizuar nga Ministria e Mbrojtjes.

Dokumenti parasheh themelimin e Korporatës Shtetërore të Industrisë së Mbrojtjes me gjashtë divizione. Municionet vijnë të parat, por planet përfshijnë edhe dronë taktikë, sisteme antidronë, elektronikë ushtarake, blinda dhe pajisje personale për ushtarët.

Divizioni i municioneve do të ndërtojë një fabrikë moderne në perëndim të vendit, me Jahocin e Gjakovës si lokacion të mundshëm. Fabrika do të përdorë teknologji turke ose gjermane për prodhimin e municioneve të para “Made in Kosova”.

Një divizion i veçantë për sistemet pa pilot do të zhvillojë dhe prodhojë dronë taktikë dhe sisteme antidronë. Ky divizion do të bashkëpunojë edhe me federatat e industrisë dhe agjencitë e BE-së për përshpejtimin e projekteve industriale. Plani propozon gjithashtu ngritjen e një laboratori kombëtar për këtë teknologji.

Pjesa e elektronikës do të mbulojë komunikimet taktike, sensorët dhe sistemet e komandimit e kontrollit. Kosova synon të prodhojë në vend edhe uniforma, helmeta, jelekë antiplumb dhe pajisje të tjera mbrojtëse për ushtarët.