Qeveria në detyrë e Kosovës ka bërë të ditur se përzgjedhja e 50 personave që do të strehohen në Kosovë pas dëbimit nga Shtetet e Bashkuara do të bëhet në bashkëpunim me autoritetet amerikane dhe duke pasur parasysh sigurinë kombëtare dhe rendin publik.
Ky angazhim vjen pas një vendimi të Qeverisë në detyrë të miratuar më 11 qershor, për të ofruar mbrojtje të përkohshme për shtetas të vendeve të treta të dëbuar nga territori amerikan.
Një ditë përpara këtij vendimi, Gjykata Supreme e Shteteve të Bashkuara i dha dritën jeshile administratës së presidentit Donald Trump për të rifilluar menjëherë dëbimin e migrantëve drejt vendeve të treta — dhe jo domosdoshmërisht drejt vendeve të tyre të origjinës — duke pezulluar përkohësisht një urdhër gjyqësor që u jepte migrantëve të drejtën ta kundërshtonin dëbimin.
Rastet e atyre që do të vijnë në Kosovë do të shqyrtohen në mënyrë individuale nga Ministria e Punëve të Brendshme. Mbrojtja e përkohshme që do t’u jepet do të zgjasë deri në një vit. Gjatë kësaj kohe do të vlerësohen kushtet në vendin e origjinës së tyre dhe do të ndërmerren hapa për kthimin e tyre vullnetar.
Sipas legjislacionit në fuqi, personave në mbrojtje të përkohshme u garantohet strehim, ushqim, veshmbathje, pako higjienike dhe qasje në kujdes shëndetësor, përfshirë trajtim emergjent dhe për sëmundje të vazhdueshme.
Migrantët pritet të transportohen përmes fluturimeve të ushtrisë amerikane dhe disa prej tyre janë aktualisht në pritje në aeroporte në shtete si Arizona.
Kosova ka përvojë të mëparshme në strehimin e qytetarëve të huaj, përfshirë shtetasit afganë në vitin 2021, në bashkëpunim me NATO-n dhe SHBA-në, si dhe gazetarët ukrainas në kuadër të programit “Gazetarët në Rezidencë”.
Sipas autoriteteve kosovare, këto përvoja tregojnë se institucionet e vendit janë të përgatitura dhe të afta të menaxhojnë procese të tilla humanitare.
Kryeministri në detyrë, Albin Kurti, ka theksuar se Kosova do të punojë në koordinim të ngushtë me autoritetet amerikane gjatë gjithë procesit dhe ka shprehur mirënjohjen për mbështetjen e vazhdueshme të Shteteve të Bashkuara.
Departamenti Amerikan i Shtetit gjithashtu ka përshëndetur vendimin e Kosovës, duke e cilësuar si një gjest pozitiv dhe duke shprehur falënderim për gatishmërinë e treguar.
