Një shkollë e re e gjuhës shqipe ka nisur zyrtarisht aktivitetin e saj në Londër, duke zgjeruar më tej rrjetin e arsimit shqip në diasporë.

Shkolla shqipe “Aleksandër Xhuvani” ka filluar punën më 31 janar, duke ofruar mësim të strukturuar të gjuhës shqipe për të rinjtë shqiptarë që jetojnë dhe studiojnë në Mbretërinë e Bashkuar. Programi i saj përfshin mësimin e gjuhës shqipe, si dhe njohjen me kulturën, historinë dhe traditat shqiptare.

Hapja e shkollës është mbështetur nga Qendra e Botimeve për Diasporën, si dhe nga Ambasada e Republikës së Shqipërisë dhe Ambasada e Republikës së Kosovës në Londër, të cilat kanë kontribuar edhe me pajisjen e nxënësve me librat zyrtarë të gjuhës shqipe.

Sipas organizatorëve, shkolla është hapur për t’iu përgjigjur kërkesës në rritje të komunitetit shqiptar në Londër për arsimim të rregullt në gjuhën amtare dhe për ruajtjen e identitetit kulturor ndër breza.

Përveç mësimit fizik, shkolla ka njoftuar se do të ofrojë edhe klasa online në platformën Zoom, me qëllim përfshirjen e nxënësve që nuk kanë mundësi pjesëmarrjeje fizike. Mësimi online do të zhvillohet çdo të shtunë nga ora 12:00 deri në 14:00 (ora lokale e Mbretërisë së Bashkuar).

Të interesuarit për regjistrim ose për informacione shtesë, përfshirë linkun e Zoom-it, mund të kontaktojnë shkollën përmes WhatsApp-it në numrin 07747490063.