NATO po punon në planet për një prani të përhershme ushtarake në kufirin e saj në kuadër të përpjekjeve për të luftuar agresionin rus, raportoi The Telegraph, duke cituar Sekretarin e Përgjithshëm të NATO-s, Jens Stoltenberg.
NATO ishte “në mes të një transformimi shumë themelor” që do të pasqyrojë “pasojat afatgjata” të veprimeve të presidentit rus Vladimir Putin, tha Stoltenberg në një intervistë për gazetën.
“Ajo që shohim tani është një realitet i ri, një normalitet i ri për sigurinë evropiane. Prandaj, ne u kemi kërkuar tani komandantëve tanë ushtarakë që të ofrojnë opsione për atë që ne e quajmë rivendosje, një përshtatje afatgjatë të NATO-s,” citohet Stoltenberg.
Stoltenberg, i cili kohët e fundit tha se do të zgjaste mandatin e tij si kreu i aleancës për një vit, tha gjithashtu në intervistë se vendimet për rivendosjen do të merren në një samit të NATO-s që do të mbahet në Madrid në qershor.
Pushtimi rus i Ukrainës ka shkaktuar krizën më të madhe të refugjatëve në Evropë që nga Lufta e Dytë Botërore dhe ka bërë që vendet perëndimore të rimendojnë politikat e tyre të mbrojtjes.
