Alma Sarelli, emigrante shqiptare që jeton prej 17 vitesh në Connecticut, kandidon për Senatin e këtij shteti në Distriktin e 26-të.

Ajo ka mbështetjen e Partisë Republikane dhe të Partisë së Pavarur të Connecticut-it dhe do të jetë në fletën e votimit në zgjedhjet e përgjithshme të 3 nëntorit 2026.

Sarelli tashmë mban një post të zgjedhur si anëtare e Representative Town Meeting (RTM) të Westport-it, ku shërben në katër komitete: Mbrojtja Publike, Arsimi, Parqet dhe Rekreacioni, si dhe Planifikimi dhe Zhvillimi Urban.

Ajo është gjithashtu aktive në jetën qytetare dhe jofitimprurëse të qytetit. Për katër vite ka qenë presidente e organizatës Neighbors & Newcomers of Westport dhe shërben në bordet e disa organizatave jofitimprurëse.

Sipas biografisë së publikuar në faqen e fushatës, babai i saj punonte për pajtimin e familjeve në gjakmarrje në Shqipëri, duke ndërmjetësuar mes tyre dhe duke i ndihmuar të gjenin rrugën drejt paqes.

Sarelli thotë se kjo përvojë ka formësuar mënyrën se si e sheh shërbimin publik: përmes dëgjimit, ndërtimit të besimit dhe gjetjes së pikave të përbashkëta.

Me këtë kandidim, ajo synon të sjellë në politikën e shtetit përvojën e saj si emigrante shqiptare, sipërmarrëse, nënë, aktiviste komunitare dhe zyrtare e qeverisjes lokale.