Një shtetas shqiptar i dënuar për vrasjen e bashkëshortes së tij në shtetin e Miçiganit është marrë në paraburgim nga Shërbimi Amerikan i Emigracionit dhe Doganave (ICE) pasi përfundoi dënimin me burg dhe tani përballet me deportim.
Gjin Kolbucaj, shtetas shqiptar, u arrestua nga zyra e ICE në Detroit menjëherë pasi u lirua nga Burgu Richard A. Handlon në Ionia, Michigan. Sipas autoriteteve amerikane, ai do të mbahet në paraburgim gjatë procedurave të largimit nga Shtetet e Bashkuara.
Ngjarja ndodhi më 31 mars 2006, kur Kolbucaj qëlloi për vdekje bashkëshorten e tij, Ljulaja Kolbucaj, brenda banesës së tyre në Sterling Heights, Michigan. Ljulaja ishte 39 vjeçe dhe ishte me origjinë nga ish-Jugosllavia.
Vrasja la pa nënë dy fëmijët e çiftit, të cilët në atë kohë ishin 9 dhe 11 vjeç. Sipas dokumenteve gjyqësore, Kolbucaj më vonë humbi edhe të drejtat prindërore.
Menjëherë pas vrasjes, ai qëlloi edhe veten dy herë në gjoks, por arriti të mbijetonte. Gjatë kohës që ndodhej në burgun e qarkut Macomb, ai raportohet se tentoi sërish vetëvrasjen duke u hedhur me kokë nga krevati i sipërm i qelisë.
Në vitin 2008, pak pasi kishte nisur përzgjedhja e jurisë për gjyqin, Kolbucaj pranoi fajësinë. Ai u dënua me 18 vjet burg për vrasje të shkallës së dytë, si dhe me dy vjet shtesë për përdorimin e armës së zjarrit gjatë kryerjes së krimit.
Këtë javë, ICE njoftoi se agjentët në Detroit e morën menjëherë në paraburgim pas lirimit të tij nga burgu shtetëror. Autoritetet thanë se ai do të qëndrojë në paraburgim gjatë procedurave të emigracionit, të cilat mund të përfundojnë me deportimin e tij nga Shtetet e Bashkuara.
