Boksieri shqiptar Jurgen Uldedaj ka shkruar histori më 25 tetor 2025, duke u shpallur Kampion i Botës në peshën cruiser të IBO (International Boxing Organization), pas një fitoreje madhështore ndaj Rolly Lambert Fogoum në O2 Arena të Londrës.

27-vjeçari nga Lezha, i cili zhvillon karrierën e tij profesionale në Gjermani, triumfoi me vendim unanim të gjyqtarëve, pas një ndeshjeje ku dominoi nga fillimi deri në fund, me goditje të sakta dhe kontroll të plotë të ringut.

Kjo fitore historike e vendos Uldedajn mes emrave më të mëdhenj të sportit shqiptar, duke e bërë një nga të paktët shqiptarë që mban një titull botëror në boks profesionist.

Pas shpalljes kampion bote, Uldedaj ndau me emocion fjalët e tij:

“Sot është dita që kam ëndërruar gjithë jetën time. Pas shumë viteve sakrifice, mundi dhe besimi në Zot, u shpalla Kampion i Botës IBO në peshën cruiser. Ky titull nuk është vetëm i imi – është për të gjithë shqiptarët kudo që janë.”

Ai falënderoi ekipin dhe familjen për mbështetjen e pandalshme gjatë këtij rrugëtimi:

“Faleminderit ekipit tim, familjes, trajnerëve dhe çdo personi që ka qenë pjesë e këtij rrugëtimi. Sot shkruam histori për Shqipërinë.”

Rivali i tij, kamerunasi Rolly Lambert Fogoum (18 fitore, 3 humbje, 1 barazim), nuk arriti të përballonte ritmin dhe forcën e Uldedajt, i cili tashmë mban një rekord prej 21 fitoreve dhe vetëm një humbjeje.

Në fund të ndeshjes, me flamurin kuqezi në duar, Uldedaj dërgoi një mesazh frymëzues për gjithë shqiptarët:

“Asgjë nuk është e pamundur nëse nuk dorëzohesh.”

Me këtë triumf të madh në një nga arenat më prestigjioze të botës, Jurgen Uldedaj konfirmon veten si një kampion i vërtetë dhe një krenari kombëtare për Shqipërinë dhe shqiptarët në mbarë botën.