Kosova është ofruar të bëhet vendi i parë që pranon azilkërkuesit e refuzuar nga Britania e Madhe, në një lëvizje që kryeministri Albin Kurti e quajti gjest miqësor dhe bashkëpunues me Londrën.

Gjatë vizitës së tij në Britani, Kurti tha se “Kosova dëshiron ta ndihmojë Britaninë” dhe është e gatshme të diskutojë detajet e planit me zyrtarët britanikë. “E konsiderojmë këtë detyrë miqësore dhe politike,” u shpreh ai, duke shtuar se Kosova ka kapacitete të kufizuara, por vullnet të fortë për të ndihmuar.

Sipas raportimeve të The Guardian, autoritetet britanike dhe kosovare janë në fazat e para të bisedimeve se si mund të funksionojë kjo marrëveshje. Kjo do ta bënte Kosovën vendin e parë që pranon azilkërkues të refuzuar nga Britania, ndërsa Londra kërkon “vende të treta” për menaxhimin e emigracionit.

Kurti gjithashtu theksoi se pret bashkëpunim më të ngushtë nga Britania në këmbim – veçanërisht në fushën e sigurisë, mbrojtjes dhe investimeve.

Ndërkohë, udhëheqës të tjerë të Ballkanit Perëndimor e kanë kritikuar idenë, duke thënë se Britania po “kërkon vende ku të hedhë emigrantët”. Kryeministri shqiptar Edi Rama më herët e quajti një propozim të tillë “të paimagjinueshëm para Brexit-it.”