Prokurori i Shteteve të Bashkuara, Gregory W. Kehoe, ka njoftuar se Liridon Masurica (33 vjeç, Gjilan, Kosovë), i njohur online si “@blackdb”, është deklaruar fajtor për komplot për mashtrim me pajisje. Ai përballet me një dënim maksimal prej 10 vitesh në burg federal në SHBA. Data e shqiptimit të dënimit ende nuk është caktuar.
Sipas marrëveshjes së pranimit të fajësisë, Masurica ishte administratori kryesor i BlackDB.cc, një treg kriminal online që funksionoi nga viti 2018 deri në 2025. Në këtë platformë shiteshin ilegalisht kredenciale të kompromentuara të llogarive dhe serverëve, informacione të kartave të kreditit dhe të dhëna të tjera personale të individëve, kryesisht të vendosur në SHBA, përfshirë edhe ata në shtetin e Floridës.
Artikujt e blerë në BlackDB.cc përdoreshin nga kriminelë kibernetikë për mashtrime tatimore, mashtrime me karta krediti dhe vjedhje identiteti.
Masurica, shtetas dhe banor i Kosovës, u arrestua më 12 dhjetor 2024 nga autoritetet kosovare dhe më pas u ekstradua në SHBA, sipas traktatit të ekstradimit mes dy shteteve.
Hetimet u drejtuan nga FBI, në bashkëpunim me Drejtorinë e Hetimit të Krimit Kibernetik të Policisë së Kosovës, ndërsa ndihmë të rëndësishme ofruan edhe Zyra e Atasheut Ligjor të FBI-së në Sofje, Bullgari, dhe Departamenti i Drejtësisë i SHBA-së.
